Cate Blanchett

Catherine Elise Blanchett (1969-yil 14-mayda tug'ilgan) — avstraliyalik aktrisa va prodyuser. O'z avlodining eng yaxshi aktrisalaridan biri sifatida e'tirof etilgan u mustaqil filmlar, blokbasterlar va teatr sahnasidagi turfa xil rollari bilan tanilgan. Blanchett ko'plab nufuzli mukofotlar, jumladan ikki karra "Oskar", uch karra BAFTA, uch karra Screen Actors Guild va uch karra "Oltin globus" mukofotlari sovrindoridir. Milliy drama san'at institutini tamomlagach, Blanchett aktrisalik faoliyatini Avstraliya sahnasida boshlagan va 1992-yilda "Electra", 1994-yilda esa "Hamlet" spektakllarida rol o'ynagan. U xalqaro miqyosda "Elizabeth" (1998) dramatik filmidagiqirolicha Elizabeth I roli bilan tanildi. Ushbu roli uchun u "Eng yaxshi aktrisa" yo'nalishida "Oltin globus" va BAFTA mukofotlarini qo'lga kiritib, o'zining yettita "Oskar" nominatsiyasidan birinchisiga sazovor bo'lgan. Martin Scorsese'ning "The Aviator" (2004) filmida Katharine Hepburn obrazini gavdalantirib, "Eng yaxshi ikkinchi plandagi aktrisa" sifatida "Oskar" mukofotini oldi. Keyinchalik Woody Allen'ning "Blue Jasmine" (2013) komediyali dramasida nevrotik sobiq zodagon ayol rolini o'ynagani uchun "Eng yaxshi aktrisa" nominatsiyasida yana bir bor "Oskar"ni qo'lga kiritdi. Blanchettning "Oskar"ga nomzod bo'lgan boshqa filmlari qatoriga "Notes on a Scandal" (2006), "I'm Not There" (2007), "Elizabeth: The Golden Age" (2007) va "Carol" (2015) kiradi. Uning eng ko'p daromad keltirgan filmlari sirasiga "The Lord of the Rings" (2001–2003) va "The Hobbit" (2012–2014) trilogiyalari, "The Curious Case of Benjamin Button" (2008), "Indiana Jones and the Kingdom of the Crystal Skull" (2008), "Cinderella" (2015), "Thor: Ragnarok" (2017) va "Ocean's 8" (2018) kiradi.