Bryan Cranston

Bryan Lee Cranston (1956-yil, 7-mart) — amerikalik aktyor. Televideniyedagi kichik rollardan so‘ng, u teatr va kino olamida komediya va dramatik yo‘nalishdagi yetakchi aktyor sifatida tanildi. Yetti karra «Primetime Emmy», «Golden Globe», «Laurence Olivier» va ikki karra «Tony» mukofotlari sovrindori, shuningdek, «Oscar» va «BAFTA» mukofotlariga nomzod bo‘lgan. Cranston «Malcolm in the Middle» (2000–2006) sitkomidagi Hal roli bilan keng omma e’tiboriga tushdi va bu ijrosi uchun «Emmy»ga nomzod bo‘ldi. Uning dunyo miqyosidagi eng katta yutug‘i «Breaking Bad» (2008–2013) kriminal dramasidagi Walter White roli bo‘ldi — bu obraz uchun u to‘rt bor «Eng yaxshi dramatik aktyor» nominatsiyasida «Emmy» mukofotini qo‘lga kiritgan. U shuningdek «All the Way» (2016) va «Curb Your Enthusiasm» (2018) loyihalari uchun ham «Emmy» nominatsiyalarini olgan. «Sneaky Pete» (2015–2019) serialining hammuallifi va ishtirokchisi, «Your Honor» (2020–2023) dramasida esa bosh rolni ijro etgan. Teatr sahnasida «All the Way» (2014) spektaklidagi Lyndon B. Johnson roli uchun «Tony» mukofotiga sazovor bo‘ldi va ushbu obrazni HBO filmida ham takrorladi. Howard Beale roli uchun esa «Laurence Olivier» va ikkinchi marta «Tony» mukofotini qo‘lga kiritdi.