Brittany Murphy

Brittany Anne Murphy-Monjack (qizlik familiyasi Bertolotti; 1977-yil 10-noyabr – 2009-yil 20-dekabr) — amerikalik aktrisa va qo'shiqchi. Atlantada tug'ilgan Merfi o'smirlik chog'ida Los-Anjelesga ko'chib o'tib, aktrisalik faoliyatini boshlagan. uning uchun ilk muvaffaqiyatli qadam "Clueless" (1995) filmidagi Tai Frasier roli bo'ldi. Shundan so'ng u "Freeway" (1996) va "Bongwater" (1998) kabi muqobil filmlarda ikkinchi plandagi rollarni o'ynadi. 1997-yilda u Brodveyda Arthur Millerning "A View from the Bridge" spektaklida sahna debyutini qildi, so'ngra "Girl, Interrupted" (1999) filmida Deyzi Rendon va "Drop Dead Gorgeous" (1999) filmida Liza Svenson rollarini ijro etdi. 2000-yillarda Merfi Maykl Duglas bilan birgalikda "Don't Say a Word" (2001) hamda Eminem bilan birga tanqidchilar e'tirofiga sazovor bo'lgan "8 Mile" (2002) filmlarida suratga tushdi. Uning keyingi ishlariga "Riding in Cars with Boys" (2001), "Spun" (2002), "Just Married" (2003), "Uptown Girls" (2003), "Sin City" (2005) va "Happy Feet" (2006) filmlari kiradi. Shuningdek, u "King of the Hill" (1997–2010) animatsion serialida Luanne Platter ovozini bergan. Uning so'nggi filmi — "Something Wicked" 2014-yil aprel oyida chiqarilgan. 2009-yil 20-dekabrda Merfi 32 yoshida shubhali holatda vafot etdi. Sud-tibbiyot ekspertizasining xulosasiga ko'ra, uning o'limiga kamqonlik va retsept bo'yicha dorilarni suiiste'mol qilish tufayli og'irlashgan pnevmoniya sabab bo'lgan.