Brandon Hardesty

Brendon Hardesti 1987-yil 13-aprelda Merilend shtatining Baltimor shahrida tug‘ilgan. U Baltimor lyuteran maktabida o‘qib yurgan vaqti, 6-sinfda ingliz tili o‘qituvchisining taklifi bilan maktab spektaklida qatnashgan. U "The Crucible" va "George Washington Slept Here" kabi ikkita sahnada rol o‘ynagan. Maktabni tugatgach, Stivenson universiteti hamda Tayson universitetida kino yo‘nalishi bo‘yicha tahsil olgan. 2006-yilda YouTube endi ommalasha boshlagan paytda Hardesti ota-onasining yerto‘lasida videolar suratga ola boshlagan. Bu videolarda u sevimli kino sahnalarini qayta gavdalantirgan. Ular tezda mashhurlikka erishgan va 2007-yilda Hardestining videosi Geico reklama roligiga kiritilgan. 2007-yil oxirida uning videolaridan birini ko‘rgan kino prodyuseri Hardesti bilan bog‘lanib, Uilyam H. Meysi va Sheril Xayns bosh rollarni ijro etgan "Bart Got A Room" nomli muqobil film kastingida qatnashishni taklif qilgan. Hardesti rolga tasdiqlangan va shundan so‘ng o‘ziga agent topgan. 2008-yil boshida Hardesti "Jimmy Kimmel Live" ko‘rsatuvida ketma-ket besh marta chiqish qilib, o‘sha yilgi eng yaxshi film nominatsiyasiga da’vogar beshta kartinadagi sahnalarni o‘zi qaytadan ijro etib ko‘rsatgan. Shundan so‘ng u Sharqiy qirg‘oqda qolib, oziq-ovqat do‘konida ishlagan, keyinchalik "American Pie Presents: The Book Of Love" filmida bosh rolni, shuningdek, "Bucky Larson: Born To Be A Star" komediyasida ikkinchi darajali rolni qo‘lga kiritgan. Shundan buyon Hardesti Kaliforniyaning Los-Anjeles va Merilend shtatining Baltimor shaharlarida ikkita qirg‘oqda yashab kelmoqda. U YouTube uchun videolar suratga olishni davom ettirmoqda, biroq asosiy e’tiborini badiiy film va teledasturlardagi kastinglarda qatnashishga qaratgan.