Bradley Cooper

Bradley Charles Cooper (1975-yil 5-yanvarda tug‘ilgan) — amerikalik aktyor va rejissyor. U British Academy Film Award hamda uch karra Grammy mukofoti sohibi. Shuningdek, Cooper 12 marta Akademiya mukofoti (Oscar), 6 marta Oltin globus va Tony mukofotiga nomzod bo‘lgan. Forbes jurnalining «Celebrity 100» ro‘yxatiga uch marta, 2015-yilda esa Time jurnalining dunyodagi eng nufuzli 100 kishi ro‘yxatiga kiritilgan. U suratga tushgan filmlar dunyo bo‘ylab 13 milliard dollardan ortiq mablag‘ to‘plagan, aktyor esa to‘rt bor dunyoning eng ko‘p haq oluvchi san’atkorlari safidan joy olgan. Cooper ijodiy faoliyatini 1999-yilda «Sex and the City» serialidagi epizodik rol bilan boshlagan. 2000-yilda «Actors Studio»ning magistratura dasturiga qabul qilingan. Ko‘p o‘tmay, 2001-yilda «Wet Hot American Summer» komediyasida debyut qilgan, keyinchalik «Alias» (2001–2006) serialida Will Tippin rolini va «Wedding Crashers» (2005) filmida ikkinchi darajali rolni ijro etgan. Aktyorga katta shuhrat keltirgan asar 2009-yilgi «The Hangover» komediyasi bo‘lib, uning davomlari 2011 va 2013-yillarda ekranlarga chiqqan. Keyinchalik «Limitless» (2011) va «The Place Beyond the Pines» (2012) filmlarida bosh rollarni ijro etib, o‘z mavqeini mustahkamlagan. Cooper «Silver Linings Playbook» (2012), «American Hustle» (2013), «American Sniper» (2014), «A Star Is Born» (2018) hamda «Maestro» (2023) filmlaridagi rollari uchun Akademiya mukofotiga nomzod bo‘lgan.