Bong Joon Ho

Bong Joon-ho (1969-yil 14-sentyabrda tugʻilgan) — janubiy koreyalik kinorejissyor. Uch karra Oskar mukofoti sovrindori boʻlgan ijodkorning ishlari ijtimoiy va sinfiy mavzularga urgʻu berishi, janrlarni uygʻunlashtirishi, qora yumor va ohangning toʻsatdan oʻzgarib turishi bilan ajralib turadi. U dastlab oʻzining rejissyorlik debyuti boʻlgan "Barking Dogs Never Bite" (2000) qora komediyasi bilan tomoshabinlarga tanilib, muxlislar eʼtiborini qozongan boʻlsa, keyingi filmlari — "Memories of Murder" (2003) kriminalli trilleri, "The Host" (2006) monster filmi, Bongning ingliz tilidagi ilk ishi boʻlgan "Snowpiercer" (2003) ilmiy-fantastik jangari filmi va olqishlarga sazovor boʻlgan "Parasite" (2019) qora komediya trilleri orqali ham tanqidiy, ham tijoriy muvaffaqiyatga erishdi. Bu filmlarning barchasi Janubiy Koreyadagi eng kassabop kartinalar qatoriga kiradi, jumladan, "Parasite" Janubiy Koreya tarixidagi eng koʻp mablagʻ yigʻgan filmga aylandi. Bongning barcha filmlari Janubiy Koreya mahsuloti hisoblanadi. Biroq "Snowpiercer", "Okja" (2017) va "Mickey 17" (2025) filmlari ingliz tilidan keng foydalanilgan holda suratga olingan Hollywood qoʻshma loyihalaridir. Uning ikkita filmi Kann kinofestivalining asosiy tanlov dasturida qatnashgan — "Okja" (2017) va "Parasite" (2019). Ulardan oxirgisi Janubiy Koreya kino tarixida ilk bor festivalning bosh mukofoti — "Oltin palma yaprogʻi"ni qoʻlga kiritdi. Oskar mukofotlarining yaqqol favoriti sifatida eʼtirof etilgan "Parasite" Oskar mukofotiga nomzod etib koʻrsatilgan ilk janubiy koreyalik film boʻldi va Bong "Eng yaxshi film", "Eng yaxshi rejissyor" hamda "Eng yaxshi original ssenariy" yoʻnalishlarida gʻolib chiqdi.