Billy Porter

William Ellis Porter II (1969-yil 21-sentyabrda tug'ilgan) — amerikalik aktyor va xonanda. U Broadway sahnasidagi chiqishlari orqali tanilgan, keyinchalik yakkaxon ijodini boshlagan. «Kinky Boots» myuziklidagi Lola roli uchun 2013-yilda «Tony», «Drama Desk» va «Outer Critics Circle» mukofotlariga sazovor bo'lgan. Porter bu rolni o'zining ayollik qirrasini kashf etish va zaharli erkaklik stereotiplariga qarshi kurashishda muhim qadam deb biladi. 2014-yilda ushbu myuzikl albomi uchun «Grammy» mukofotini qo'lga kiritgan. U «Pose» serialining uchta mavsumida suratga tushgan, mazkur roli uchun uch bor «Oltin globus»ga nomzod bo'lib, 2019-yilda «Emmy» mukofotini qo'lga kiritgan va dramatik serialda bosh rol uchun mukofotlangan ilk gey qora tanli aktyorga aylangan. 2020-yilda Time jurnalining dunyodagi eng nufuzli 100 kishi ro'yxatiga kiritilgan. 2022-yilda «A Strange Loop» myuzikli prodyuseri sifatida navbatdagi «Tony» mukofotini olgan. Shu yili «Anything's Possible» romantik komediyasi bilan rejissyorlik debyutini amalga oshirgan. Elizabeth Taylor AIDS Foundation va Entertainment Community Fund jamg'armalaridagi xayriya ishlari uchun 77-Tony marosimida «Isabelle Stevenson» mukofoti bilan taqdirlangan.