Bill Nighy

William Francis Nighy (1949-yil 12-dekabrda tugʻilgan) — britaniyalik aktyor. Teatr va kinodagi rollari bilan tanilgan u ikkita BAFTA va bitta “Oltin globus” mukofotlarini qoʻlga kiritgan, shuningdek, “Oskar”, “Toni”, “Laurence Olivier” va ikkita SAG mukofotlariga nomzod boʻlgan. Nighy oʻz karyerasini Liverpul shahridagi Everyman Theatre'da boshlagan va Londondagi debyutini 1977-yilda Royal National Theatre'da “The Illuminatus!” spektakli bilan amalga oshirgan. U David Hare'ning “Pravda” (1985), Harold Pinter'ning “Betrayal” (1991), Tom Stoppard'ning “Arcadia” (1993) va Anton Chexovning “The Seagull” (1994) asarlaridagi rollari uchun eʼtirofga sazovor boʻlgan. 2001-yilda “Blue/Orange” dagi roli uchun “Laurence Olivier mukofoti”ga nomzod boʻlgan. Broadway'da David Hare'ning “The Vertical Hour” (2006) va “Skylight” (2015) pyesalarida oʻynab, oxirgisi uchun “Eng yaxshi aktyor” nominatsiyasida “Toni” mukofotiga nomzod boʻlgan. Nighy dastlabki kino rollarini “Still Crazy” (1998), “Guest House Paradiso” (1999) va “Blow Dry” (2001) komediyalarida ijro etgan. U “Love Actually” (2003) filmidagi roli bilan xalqaro miqyosda shuhrat qozonib, “Eng yaxshi ikkinchi plandagi aktyor” uchun BAFTA mukofotini qoʻlga kiritdi. Keyinchalik “Underworld” (2003–2009) film seriyasida Viktor va “Pirates of the Caribbean” (2006–2007) seriyasida Devi Jones rollarini gavdalantirdi. Uning boshqa mashhur filmlari qatoriga “Shaun of the Dead” (2004), “The Hitchhiker's Guide to the Galaxy” (2005), “Hot Fuzz” (2007), “Valkyrie” (2008) va boshqalar kiradi.