Ben Mendelsohn

Pol Benjamin Mendelson (1969-yil 3-aprelda tug‘ilgan) — avstraliyalik aktyor. U Avstraliyada ilk bor "The Year My Voice Broke" (1987) filmidagi debyut roli orqali mashhurlikka erishgan. Xalqaro miqyosdagi e'tirofni esa "Animal Kingdom" (2010) kriminallik dramasidagi bosh roli orqali qozongan. Shundan so‘ng u "The Dark Knight Rises" (2012), "Starred Up" (2013), "Lost River" (2014), "Mississippi Grind" (2015), "Rogue One" (2016), "Darkest Hour" (2017) va "Ready Player One" (2018) kabi filmlarda suratga tushgan. Mendelson Netflix telekanalining "Bloodline" (2015–2017) dramasida bosh rolni ijro etib, 2016-yilda "Dramatik serialdagi eng yaxshi ikkinchi darajali aktyor" nominatsiyasida Primetime Emmy mukofotini qo‘lga kiritgan. U "Robin Hood" (2018) filmida Nottingem sherifini gavdalantirgan. Shuningdek, Marvel kinematografiya koinotiga qo‘shilib, "Captain Marvel" (2019) superqahramonlik filmi va Disney+ telekanalining "Secret Invasion" (2023) serialida Talos rolini o‘ynagan. U HBO telekanalining "The Outsider" (2020) kriminallik mini-serialida ham bosh rolni ijro etgan. 2024-yildan boshlab "The New Look" teleserialida mashhur modelyer Kristian Dior obrazini gavdalantira boshlagan.