Atıf Yılmaz
Biografiya
Atıf Yılmaz Batıbeki (1925-yil 9-dekabr — 2006-yil 5-may) turk kinematografiyasining afsonaviy namoyandasi, rejissor, ssenariynavis va prodyuser bo'lgan. 1951-yildan buyon ijod qilib, 119 ta filmga rejissorlik qilgan, 53 ta ssenariy yozgan va 28 ta filmni prodyuserlik qilgan. U turk kino sanoatining deyarli barcha davrlarida faol mehnat qilgan. Mersindagi maktabni tugatgach, Istanbul universitetining huquq fakultetiga o'qishga kirgan, biroq san'atga bo'lgan qiziqishi uni Tasviriy san'at akademiyasining rangtasvir bo'limiga yetaklagan. Akademiyani bitirgach, ma'lum vaqt ijodiy ustaxonalarda ishlagan va bu tajriba keyinchalik rejissorlik faoliyatida qo'l kelganini ta'kidlagan. Faoliyatining ilk davrida kino tanqidchilik, rassomlik va ssenariynavislik bilan shug'ullangan. 1950-yilda Semih Evinning yordamchisi sifatida ikki filmda ishlaganidan so'ng, "Kanli Feryat" filmi bilan mustaqil rejissorlik karyerasini boshlagan. 1960-yilda aktyor Orhan Günsiray bilan birgalikda "Yerli Film" studiyasiga asos solgan. Uning eng muhim filmlari qatoriga "Hickirik", "Alageyik", "Suclu", "Seni Kaybedersem", "Yaban Gülü", "Kesanli Ali Destani", "Tacsiz Kral", "Topragin Kani", "Olum Tarlasi", "Utanc", "Zavallilar" hamda "Selvi Boylum, Al Yazmalim" kiradi.
