Arif Babayev

Arif Hoji o'g'li Babayev — Ozarbayjon kino rejissyori va Ozarbayjon SSR xizmat ko'rsatgan san'at arbobi. Arif Babayev 1928-yil 20-sentabrda Boku shahrining Ichari Shahar qismidagi Qala ko'chasida tug'ilgan. Bolaligida havaskorlik teatr to'garaklariga qatnashgan. U teatrga bo'lgan qiziqishi tufayli teatr bilim yurtiga o'qishga kiradi. O'sha paytdayoq u "Malikmammad", "Qoraja qiz" va "Ibrat" spektakllarida ommaviy sahna ko'rinishlarida qatnashgan. 1946-yilda teatr bilim yurti negizida Ozarbayjon davlat teatr instituti tashkil etilib, Arif Babayev rejissyorlik yo'nalishiga qabul qilinadi. Unga taniqli rejissyor va aktyor Mehdi Mammadov ustozlik qiladi. Mehdi Mammadov N.V. Gogolning "Revizor" asaridagi Mer roli ijrosini Arif Babayevga ishonib topshiradi. 1953-yilda institutni tamomlagandan so'ng, u Naxchivon davlat teatriga ishga yuboriladi va u yerda Gogolning "Uylanish" pyesasini sahnalashtiradi. Bir muncha vaqt o'tgach Bokuga qaytib, Yosh tomoshabinlar teatrida sahna rejissyori bo'lib ishlay boshlaydi. 1956-yil 14-fevralda Ozarbayjon televideniyesining ilk ko'rsatuvi efirga uzatildi va Arif Babayev televideniyega taklif etildi. 1956-yilda u Ozarbayjonda telerejissyorlikka asos solgan holda o'zining ilk "Shahrimiz bolalari" nomli hujjatli filmini suratga oldi. 1959-yilda Ozarbayjon televideniyesining bosh rejissyori etib tayinlandi. Bu yillarda u bir qator hujjatli filmlar suratga olib, Musa Jalilning "Moabit daftarlari", shuningdek, boshqa asarlar asosida telepeyaslarni sahnalashtirdi.