Anna Sawai

Anna Savay (1992-yil 11-iyunda tug‘ilgan) — yaponiyalik aktrisa va qo‘shiqchi. Yangi Zelandiyada tug‘ilgan, 10 yoshida oilasi bilan Yaponiyaga ko‘chib o‘tgan. Ilk aktrisalik rolini 11 yoshida Nippon Television kompaniyasining 2004-yilgi "Annie" loyihasida bosh qahramon sifatida ijro etgan. Keyinchalik 2009-yilda Jeyms MakTiguning "Ninja Assassin" jangari filmida debyut qilgan. Savay Yaponiyada 2013–2018-yillarda "Faky" qizlar guruhi solistlaridan biri sifatida tanilgan. U 2019-yilda Britaniyaning "Giri/Haji" jinoyat-triller serialida ikkinchi darajali rolni ijro etib, aktrisalikka qaytdi. Uning xalqaro miqyosdagi haqiqiy muvaffaqiyati Apple TV+ telekanalining "Pachinko" (2022–hozirgacha) dramatik serialidagi roli bilan keldi. Shuningdek, u MonsterVerse seriyasidagi "Monarch: Legacy of Monsters" (2023–hozirgacha) va tarixiy "Shōgun" (2024) seriallaridagi bosh rollari orqali yanada katta e'tirofga sazovor bo‘ldi. Oxirgi roli uchun u "Drama serialidagi eng yaxshi bosh rol aktrisasi" nominatsiyasida Primetime Emmy mukofotini qo‘lga kiritdi. U Primetime Emmy, Oltin globus va Screen Actors Guild mukofotlarini qo‘lga kiritgan ilk yaponiyalik aktrisaga aylandi. 2024 yilda "Time" jurnali uni "100 Next" ro‘yxatiga kiritdi.