Anna Paquin

Anna Helene Paquin (1982-yil 24-iyul) — Yangi Zelandiya aktrisasi. Kanadada tug‘ilib, Yangi Zelandiyada o‘sgan aktrisa “The Piano” (1993) romantik dramasidagi debyuti bilan 11 yoshida “Eng yaxshi ikkinchi darajali aktrisa” nominatsiyasida Oskar mukofotini qo‘lga kiritgan va tarixdagi eng yosh sovrindorlardan biriga aylangan. Bolaligida u “Fly Away Home”, “Jane Eyre”, “Amistad”, “The Member of the Wedding”, “A Walk on the Moon” va “Almost Famous” filmlarida rol o‘ynagan. Paquin ulg‘ayganidan so‘ng ham muvaffaqiyatli karyerasini davom ettirdi. U “X-Men” franshizasida Rogue rolini (2000–2006, 2014) ijro etgan. Boshqa muhim kinoloyihalari qatorida “25th Hour”, “Trick 'r Treat”, “Margaret”, “The Good Dinosaur” va “The Irishman” filmlari bor. HBO telekanalining “True Blood” (2008–2014) dramatik serialida bosh qahramon Sookie Stackhouse rolini ijro etgani uchun 2009-yilda “Oltin globus” mukofotiga sazovor bo‘lgan. Shuningdek, u “Bury My Heart at Wounded Knee” va “The Courageous Heart of Irena Sendler” telefilmlaridagi ijrosi uchun nufuzli mukofotlarga nomzod bo‘lgan.