Anna May Wong

Wong Liu Tsong (1905-yil 3-yanvar – 1961-yil 3-fevral) – Anna May Wong nomi bilan tanilgan amerikalik aktrisa. Uning uzoq davom etgan faoliyati ovozsiz va ovozli kinolar, televideniye, teatr va radiodan iborat. Xitoylik-amerikalik birinchi kino yulduzi va xalqaro miqyosga chiqqan ilk osiyolik-amerikalik aktrisa sifatida tarixda qolgan. Shuningdek, 1920-yillardagi moda ikonalaridan biri sifatida ham e'tirof etilgan. Los-Anjelesning Chaynataun hududi yaqinida tug'ilgan aktrisa bolaligidanoq kinoga qiziqib qoladi va aktyorlik faoliyatini boshlash uchun o'qishni tashlaydi. Avvaliga ovozsiz filmlarda epizodik rollarda qatnashgan bo'lsa, keyinchalik rangli filmlardan biri bo'lgan "The Toll of the Sea" (1922) asarida ilk bosh rolni ijro etadi. Daglas Feyrbanksning "The Thief of Bagdad" (1924) filmidagi roli unga jahon darajasidagi mashhurlikni olib keldi. Gollivudda unga taklif qilinayotgan stereotip rollardan charchab, 1920-yillar oxirida Yevropaga ko'chib o'tadi va u yerda Lourens Olive kabi mashhur aktyorlar bilan sahnada rol o'ynaydi. Britaniyada suratga olingan so'nggi ovozsiz filmi "Piccadilly" (1929) katta muvaffaqiyatga erishdi. Uning ilk ovozli filmi "The Flame of Love" (1930) ingliz, fransuz va nemis tillarida yozib olingan.