Anggun

Anggun Cipta Sasmi (1974-yil 29-aprelda tug‘ilgan) — indoneziyalik va fransiyalik xonanda, qo‘shiqnavis va teleboshlovchi. Jakartada tug‘ilgan xonanda yetti yoshidan sahnaga chiqib, to‘qqiz yoshida bolalar uchun albom yozgan. 1989-yilda o‘smir rok-yulduz sifatida mashhur bo‘lib, 1993-yilga kelib beshta indonez tilidagi studiyaviy albomini chiqargan. Uning «Mimpi» qo‘shig‘i «Rolling Stone» nashri tomonidan «Indoneziyaning eng yaxshi 150 ta qo‘shig‘i» qatoriga kiritilgan. 1994-yilda xalqaro faoliyatini rivojlantirish uchun Angliyaga, keyinroq Fransiyaga ko‘chib o‘tgan. Uning birinchi xalqaro albomi «Snow on the Sahara» (1997) 33 mamlakatda chiqarilib, milliondan ortiq nusxada sotilgan. Anggun Daniyaning «Open Hearts» (2002) filmi uchun saundtrek yozgan. U 2012-yilda «Echo (You and I)» qo‘shig‘i bilan Fransiyani «Yevrovideniye» tanlovida himoya qilgan. Shuningdek, u «The X Factor», «Got Talent», «The Voice» va «Masked Singer» kabi mashhur teleloyihalarda hakamlik qilgan.