Alonso Ruizpalacios

Alonso Ruizpalacios (1978-yilda tug‘ilgan) — meksikalik kino rejissyor. U Mexiko shahrida tug‘ilib o‘sgan. Mexikoda sahna rejissyorligini o‘rgach, Londonga ko‘chib o‘tgan va RADA'da aktyorlik mahorati bo‘yicha tahsil olgan. Ruizpalacios teatr va kino uchun ssenariylar yozadi hamda ularni sahnalashtiradi. Uning qisqa metrajli "Café Paraíso" filmi kinofestivallarda ko‘plab mukofotlarga sazovor bo‘lgan. Oq-qora rangda suratga olingan "Gueros" nomli debyut full-metrajli filmi tanqidchilar tomonidan yuqori baholanib, 2015-yilda 5 ta Ariel mukofotini, jumladan, "Eng yaxshi film", "Eng yaxshi debyut film" va "Eng yaxshi rejissyor" nominatsiyalarini qo‘lga kiritgan. Ruizpalacios, shuningdek, meksikalik qo‘shiqchi-qo‘shiq muallifi Natalia Lafourcade'ning "Hasta la Raíz" qo‘shig‘iga klip suratga olgan. U yaqinda bosh rolni Gael García Bernal ijro etgan "Museo" filmini suratga oldi. Film Berlin xalqaro kinofestivalida "Eng yaxshi ssenariy" mukofotini qo‘lga kiritdi. "Museo" boshqa xalqaro festivallarda ham namoyish etilgan. Film 1985-yil 25-dekabrda Mexiko shahridagi Milliy antropologiya muzeyida sodir bo‘lgan mashhur o‘g‘rilik voqeasini hikoya qiladi. U shuningdek, teleko‘rsatuvlarga ham o‘z hissasini qo‘shgan: "Narcos: Mexico" serialining ikkita epizodiga va Meksikaning "Aquí en la tierra" teleko‘rsatuviga rejissyorlik qilgan, shuningdek, Once Tv meksika telerarmarkasining "XY" serialida bosh prodyuser (showrunner) bo‘lib ishlagan.