Aamir Khan

Aamir Hussain Khan (1965-yil 14-martda tugʻilgan) — hindistonlik aktyor, rejissyor, prodyuser va teleboshlovchi, Hindiston kinosining eng nufuzli namoyandalaridan biri. Faoliyatini bolaligida amakisi Nasir Hussainning „Yaadon Ki Baaraat“ (1973) filmida boshlagan boʻlsa-da, professional faoliyati 1984-yilda „Holi“ filmi bilan boshlangan. Uning ilk tijoriy muvaffaqiyati „Qayamat Se Qayamat Tak“ (1988) filmi boʻldi. „Raakh“ (1989) filmidagi roli uchun ilk Milliy kino mukofotini olgan. „Raja Hindustani“ (1996) filmidagi ijrosi uchun birinchi marta „Filmfare“ning eng yaxshi aktyor mukofotiga erishgan. Keyinchalik „Lagaan“ (2001) filmi uchun ham shu mukofotni olgan va bu film uning prodyuserlik faoliyatining boshlanishi boʻlgan. Toʻrt yillik tanaffusdan soʻng u „Mangal Pandey: The Rising“ (2005) bilan qaytdi. „Rang De Basanti“ (2006) uchun tanqidchilar mukofotiga sazovor boʻlgan. Rejissyorlik debyuti „Taare Zameen Par“ (2007) uchun „Filmfare“ mukofotini oldi. Uning „Ghajini“ (2008) va „3 Idiots“ (2009) filmlari oʻz davrida boks ofis rekordlarini yangilagan.